Frábært frí

Við komumst til Lux og gekk flugið bara vel, lósin voru slöggt og allir sofnuðu. Nú erum við í dásamlegu yfirlæti hjá Kollu og Arnari. Börnin eru alsæl enda nóg pláss til að hlaupa og leika, þetta er allt eins og best verður á kosið. Hér leika börnin í hverfinu mikið saman og hlaupa á milli húsa. Standard spurning þegar nýjir krakkar bætast í hópinn: ,,Ertu íslensk?" Ásrún fékk þessa spurningu og vissi líklega ekki hvað hún þýddi því hún kom grátandi heim og kvartaði yfir því að stelpan hefði sagt að hún væri íslensk. Við reyndum að fela hláturinn og sögðum henni að það væri alls ekki slæmt að vera íslensk. Jæja, ekki ætla ég að tefja hér lengur, sundferð framundan.

Uhh .... Nei!

Ég bloggaði um það í morgun að ég væri á leiðinni til Lux, Uhhh .... Nei!  Ekki í bili.  Fluginu hefur verið frestað til rúmlega tvö í nótt, spennandi að sjá hvort það verður raunin.  Við vorum komin í höfuðborgina þegar fréttirnar um seinkunina bárust með smsi.  Þá var oft seint að snúa við heim svo við reyndum að gera gott úr þessu.  Fórum í pílagrímsferð með börnin á bensínstöðina við Laugaveginn, leituðum að starfsmanni á plani og fundum hann ekki en þegar Hreinn tjáði afgreiðslumanninum erindið, fengu börnin liti og litabók að gjöf.  Við létum svo verða af því að fara á Þjóðminjasafnið, búið að vera á planinu lengi.  Það var frábær ferð og skemmtum við okkur öll vel, sáum gamla muni úr Keldnakirkju og Odda, upplifunarherbergin slóu í gegn og svo voru í búðinni keyptar gjafir fyrir gestgjafana það er að segja ef við komumst til þeirra.  Við reynum annars að láta þetta ekki á okkur fá og erum í dúnduryfirlæti hjá Þrúði og Duffa.  Það kvartar enginn og við sláum þessu upp í létt grín frekar en hitt.  Hins vegar væri ekki verra að komast í nótt í flugið en þá tekur við veðurspáin yfir landinu einmitt um það leyti sem áætlað er að fara í loftið, eigum við að ræða það eitthvað, nei ég held ekki.

Kannski er okkur ekki ætluð þessi ferð, og þó, ég kem Kolla mín.

Sumarauki

Ég horfði stolt með tárin í augunum á herlegheitin og landsliðið í gær í sjónvarpinu. Ég verð svo meyr við svona fjölda, mundi eftir því hvað það var gaman og eftirminnilegt að ganga með konunum 19.júní fyrir 3 árum. Við megum líka alveg fara að gráta af gleði og stolti, við eigum að fagna lífinu og ævintýrum þess þegar færi gefst. Því eins og Þorvaldur Þorsteinsson segir í skilaboðaskjóðinni þá er lífið heimsins besta gotterí. Verum glöð og aftur glöð fyrir lífið og það að vera við sjálf, alveg eins og við erum og þannig elskar Guð okkur.
Við erum annars á leið í frí til Kollu minnar og fjölskyldu á eftir til Lux, hlakka til og börnin mikið spennt enda búið að telja niður. Veðurspáin er ekki af verri endanum:
http://meteo.luxweb.com/
Bless í bili.

Landbúnaðarsýning, silfur og brúðkaup

Þetta hefur verið skemmtileg og annasöm helgi sem enn er ekki lokið. Á föstudag var landbúnaðarsýningin á Hellu sett og er hún mjög vel heppnuð að mínu mati, gaman að skoða allt sem er til sýnis. Flott að fólk lét rigningu ekki aftra sér í að fara á sýninguna því hún var vel sótt í gær. Í gær gaf ég saman Ingunni Svölu æskuvinkonu mína og Einar Gunnar, það var frábært og veislan þeirra alveg meiriháttar. Nú svo var það silfrið í morgun, við megum vera virkilega stolt, þetta hefur svo sannarlega sett krydd í tilveruna. Svo er það útimessa á eftir kl. tvö á landbúnaðarsýningunni, gaman að taka þátt í því.

Skipulag

Ég þrífst á skipulagi, röð og reglu, þá finnst mér allt eins og það á að vera. Einmitt þess vegna leið mér betur í Þýskalandi en Danmörku. Þetta getur stundum skapað árekstra og sérstaklega þegar skipulagið gengur ekki upp en hvað um það, það er þroskandi að takast á við óskipulag inn á milli. Nú er ég að skipuleggja veturinn og vetrarstarfið, finnst gaman að setja þetta niður. Ég tók skrifstofuna í gegn í gær og kom skikk á hana, fór nefnilega á uppáhaldsstaðinn minn, IKEA, og þar er hægt að hafa allt í röð og reglu, kassar og hólf í tugatali. Eiginmanninum bregður örugglega í brún þegar hann kemur heim eftir 3 daga í Veiðivötnum en hann hefur veitt vel skilst mér svo það er silungur í matinn vel fram á haust. Jæja, skipuleggja meira og meira.

Yfir-vinna

Sigga spyr hvort ég sé búin að gifta yfir mig, ætli sé þá ekki um nýja túlkun á yfir-vinnu að ræða. Ég hef bara verið löt að segja hvað á daga mína hefur drifið, það er nú bara hitt og þetta, höfum verið á flakki; í matarboðum, veislum o.fl. Ásrún byrjuð aftur í leikskólanum og er það fínt, ég er farin að venja komur mínar á ný reglulega á skrifstofuna. Þyrfti hins vegar amk. einn dag til að koma skikkan á heimilið en eins og margir hafa sagt fyrr og nú þá fer þetta ekkert frá okkur og er það því miður satt. Jæja, ég ætla ekki að vera að þessu kvarti. Höfum það öll mjög gott enda einmuna blíða dag eftir dag úti sem í sinni.