Betra að borða en skreyta

Ofninn gekk vel um helgina og slett í nokkrar sortir, þannig að þau sem kíkja í kaffi fá heimabakaðar smákökur. Mér finnst gaman að baka þær og þess vegna geri ég það, ekki af skyldu. Hins vegar nenni ég ekki neinu dúlli, sörur eru rosalega góðar en það er ekki fræðilegur að ég nenni að baka þær. Mínar sortir eru þannig að þær eru hræðrar eða hnoðaðar og bakaðar. Ég ætlaði að vera voða góða mamma að skapa stemningu og baka piparkökur og leyfa börnunum að skreyta, mér fannst það spennandi í gamla daga, að mig minnir alla vega. Hins vegar var ekki nokkur áhugi fyrir hendi hjá mínum nema bara tvær köku skreyttar og borðaðar og Freyr var ekki að draga úr því að honum þótti eiginlega bara gaman að borða þær en ekki skreyta. Ég skreytti líka smá heima en Sigga ég lofa, ég kveiki ekki á aðventuljósunum fyrr á sunnudaginn, eða laugardagskvöld :-) Góðar stundir.

Hitt og þetta

Litla frænka hún Heiðbjört Guðmundsdóttir dafnar vel. Við fjölskyldan kíktum til hennar á miðvikudaginn, stálust til þess þrátt fyrir viðvarnir um smit og sýkla. Hún er algjörlega sætust, töluverð svefnpurka. Hlökkum til að sjá hana fljótlega aftur. Kíktum á jólaljósin á Selfossi í gær og erum að safna að okkur hinu og þessu fyrir jólin. Er einnig að gera tilfæringar heima á hinu og þessu og er heima núna í tiltekt, veitir ekki af. Fögnum í kvöld 100 ára afmælis skógræktarlaga og á morgun er afmæli, á sunnudag stendur til að baka piparkökur og jafnvel skreyta, en segið ekki nokkrum manni frá því.
Góða helgi.

Sætust

Móður og barni og föður heilsast vel. Við mamma kíktum á snúlluna og ég ætlaði varla að vilja sleppa henni. Allt gengur vel og hlakka Freyr og Ásrún mikið til að sjá stúlkuna.

Fleiri myndir á síðunni frá Frey og Ásrúnu, lykilorðið er oddi.

Lítil stúlka

Litla systir mín, hún Elfa og hann Freyr þ.e. Guðmunudur Freyr eignuðust litla stúlku í gærkvöldi. Hún er eitthvað mikið ólík mömmu sinni sú litla því hún lét ekki bíð eftir sér heldur kom of fljótt. Hún er því ekki nema 12 merkur og þurfti að vera á vökudeildinni í nótt. Meiri fréttir hef ég ekki, bruna líklega með ömmu og afa sem eru að springa úr monti að kíkja á skottuna og fjölskylduna. Juuuu, hvað ég hlakka til að sjá þær.
Ásrún vaknaði í gærmorgun og sagði við pabba sinn: ,,Mig dreymdi að það kom prinsessa til mín". Krúttleg tilviljun sem við setjum auðvitað í þetta samhengi. Sú litla á því sama afmælisdag og Kiddi bróðir, þannig að hjónin á Brávalla fengu frænku í afmælisgjöf.
Gleði, gleði , gleði ......

Verur og ,,vírus''

Gleymdi að nefni leikhúsferð fjölskyldunnar í Þjóðleikhúsið að sjá Skilaboðaskjóðuna, alveg frábært fyrir alla, börn sem fullorðna. Ásrún upplifði sýninga sterk og í bókstaflegri merkingu skalf af hræðslu í fanginu á mér einkum við nornina, úlfinn og nátttröllin ,,illþýðið'' eins og það er nefnt í sýningunni. Hún endurtekur í sífellu ,,Putti fór bara einn út í myrkrið og nátttröllið tók hann". Freyr svarar um leið: ,,Já, ég veit það Ásrún þú ert búin að segja það svona fjörutíu sinnum". En hún sefur róleg því auðvitað fór allt vel og létti henni stórum. Frey fannst mjög gaman en samt eiginlega of barnalegt. Ég veit upp á mig sökina því hann er löngu farin á horfa á eitthvað sem er ekki við hans hæfi. Annars þurfti ég að ná í skólapitlinn í morgun því hann þótti ekki húsum hæfur. Augað rautt og bólgið og óttaðist kennarinn og aðrir smit. Hann hafði auðvitað áhyggjur af þessu sjálfur og varð mjög hissa að við værum að fara til læknis í héraðinu en ekki í Reykjavík þar sem hann vissi að blindrafélagið væri til húsa. Svo slæmt var það nú ekki en innan á augnlokinu er stíflaður hárkirtill sem grefur í og smyrsl fékk hann við því. Engin smithætta á ferðum svo hann getur hitt fólk og talað við óhræddur.

Gott betra

Fór á skemmtilegt námskeið í dag. Námskeið um það hvernig á að halda námskeiðið Gott betra, sem er fyrir hjón og fólk í sambúð. Til að bæta eða gera góð samskipti betri. Mjög skemmtilegt og læt á það reyna eftir áramót að halda slíkt námskeið. Áhugasamir hafi samband :-)

Falleg morgubirta yfir Eyjafjallajökli

Hún var falleg birtan yfir jöklinum í dag. Þó náði ég ekki alveg tökum á henni með vélinni. En þetta er tilraun.

Hver segir að jólin komi of snemma?

Mér finnst ég hálf vera að missa af lestinni. Sumir kvarta og fussa yfir hamaganginum sem kemur of snemma út af jólunum. Ég er farin að undirbúa og skipuleggja fullt fyrir jólin. Þarf eiginlega að vera búin að öllu í nóvember. Til að njóta vinnunnar og samverustunda við fjölskyldu í desemeber. Það versta er að nóvember er að hlaupa frá mér. Nú kemur það aftan að mér að vera stundum löt og ýta verkefnum á undan mér. En hvað um það, gaman að lifa :-)