Ó nei

IKEA bæklingurinn kom í póstinum í dag og ég er í skipulagsmaníu þessa daga.
Það er líklega heppilegt að ég kemst ekki þangað næstu daga og þó..... mér leggst eitthvað til.
Annars gengur skólinn vel nema minn maður geispaði mikið við morgunverðaborðið og horfði á mömmu sína hálf vonlausum augum spyrjandi hvort það væri líka skóli um helgar.

Fyrsti dagurinn

Þá er fyrsti skóladagur Freys runninn upp og er hann farinn með skólabílnum. Ég sit hér og hálf titra, hugsa upp öll óhöppin og allt það sem getur komið fyrir hann í skólanum. Alla stóru strákana sem stríða honum. Eða ef hann verður eins og við afhendingu stundaskrár þá þarf ég frekar fyrr en seinna að mæta vegna agabrota. Jæja, ekki þýðir að velta sér of mikið upp úr hvað og ef. Hann virtist hins vegar fremur slakur yfir þessu þó var erfitt að sofna í gær. Í morgun var jafn auðvelt fyrir hann að fara á fætur eins og hann væri á leið í spennandi ævintýraferð. Morgunmaturinn gekk vel og ég kvaddi hann með bros á vör, sjáum hvað þetta endist lengi. Ég skelli hér inn mynd af drengnum á leið í skólann og ef vel er að gáð má sjá götin í neðri gómi þar sem áður voru tennur.

Skólinn

Freyr byrjar í skólanum á föstudaginn, ég er komin með innkaupalistann í hendur og hlakka svo til eða kvíði fyrir, veit ekki alveg hvort er. Við ræddum málin í gær og hann er líka kvíðinn, létti heil mikið þegar ég lýsti því yfir hversu hrædd og kvíðinn ég hafi verið þegar ég var að byrja sem prestur. Hann kveið mest fyrir því að vita ekki hvenær hann ætti að vakna, hvenær skólabíllinn kæmi og hvert hann ætti að fara. Ég fullvissaði hann um að mamma og/eða pabbi færu alltaf með honum á fætur og fylgdu honum í skólabílinn og nú fæ ég smá fyrir hjartað við tilhugsunina að senda hann einan í skólann, úff það hlýtur að venjast.
Þetta eru spennandi tímar.

P.S. Ég var alveg búin að gleyma því hvað það getur rignt mikið.

Kalli á þakinu

Það voru velheppnuð töðugjaldahátíð hér um helgina. Algjörlega himnesk kartöflusúpa í Þykkvabænum á föstudag og ýmislegt húllum hæ á Hellu á laugardeginum og veðrið eins og best verður á kosið. Við biðum nokkuð lengi eftir Kalla á þakinu á laugardag og var hann biðinnar virði, það var voða gaman að honum. Hann reyndi að fá nammi hjá krökkunum en enginn var fús til að gefa það frá sér. Ég lumaði á sleikjó og sendi Frey með hann að sviðinu til að gefa Kalla sem aðvitað þáði hann með þökkum. Þegar atriðið var búið fengu fjöldamargir mynd af sér með Kalla. Við vorum ekki með myndavél og grét minn maður heil mikið vegna þess að fá ekki mynd af sér með Kalla, mikil sorg. Þegar Hreinn kíkti á netið í gærkvöldi var málinu reddað. Komin var myndin af Frey og Kalla á þakinu, svona fær maður stundum óskir sínar uppfylltar án þess að hafa mikið fyrir því.

http://mbl.is/mm/frettir/innlent/frett.html?nid=1286088

Töðugjöld

Það eru töðugjöld framundan um helgina, ekki það að við ætlum í heyskap heldur verður húllum hæ í Þykkvabænum og á Hellu. Voða gaman, mamma og pabbi ætla að kíkja og gista, taka þátt í gríninu. Veðurspáin lofar góðu svo þetta lítur vel út.
Fékk æðiskast í eldhúsinu í gær og endurskipulagði, það var æði. Ég er töluvert klikkuð ég veit það en skipulagsfíknin fékk útrás, svo það er komið haust í mig :-) Ekki meira slór og slugs og þó.

Leti

Ég hef verið löt að setja eitthvað á þessa síðu. Nú fer allt að komast í fastar skorður hvað á hverju. Ásrún er byrjuð aftur í leikskólanum og Freyr hefur brátt sína skólagöngu. Mér finnst það gott þegar þetta fer að rúlla aftur enda við komin í þann gír og að sofna seint og vakna seint. Ég get þá kannski haldið áfram að prjóna pilsið sem ég byrjaði á fyrir mánuði, þegar kvöldin verða rólegri, eða hvað?